Category Archive Xəbərlər

“Səyyar Aqro Məktəb” layihəsi başa çatıb

“Aqrar İnkişaf Könüllüləri” Təşkilatının təşkilatçılığı, Azərbaycan Gənclər Fondunun maliyyə dəstəyi ilə həyata keçirilən “Səyyar Aqro Məktəb” layihəsi başa çatıb.

Aqrar sahədə ilk dəfə reallaşdırılan “Səyyar Aqro Məktəb” layihəsi çərçivəsində karantin rejiminin qaydalarına uyğun olaraq onlayn formatda, “Zoom” mobil tətbiqi vasitəsilə  təsərrüfat sahələrində təlimlər və görüşlər həyata keçirilib.

Layihə 2 mərhələdə reallaşdırılıb. Birinci mərhələdə layihə çərçivəsində təlim və görüşlər 6 rayonu – Şəki, Oğuz, Qax, Zaqatala, Balakən və Şamaxını əhatə edib. Belə ki, Şəkidə təlim və görüşlərdə iribuynuzlu heyvandarlıq, Oğuzda meyvəçilik və balıqçılıq, Qaxda arıçılığın inkişafı və baramaçılıq, Zaqatalada fındıqçılıq təlimi və ADAU-ya onlayn ekskursiya, Balakəndə tütünçülük və qarğıdalı təsərrüfatı, Şamaxıda üzümçülük təsərrüfatından bəhs olunub. Peşəkar təlimçilər tərəfindən 300 gəncə bu rayonların spesifik təsərrüfat sahələri üzrə ətraflı məlumat verilib.

Təlim iştirakçıları təsərrüfatların yaradılması, idarəedilməsi və gələcəkdə inkişaf etdirilməsi, təsərrüfatın xəstəliklərdən, zərərvericilərdən qorunması, həmçinin aqrar təhsilin əhəmiyyəti və imkanları barədə məlumatlandırılıb. Gəncləri maraqlandıran suallar təlimçilər tərəfindən cavablandırılıb, mövzu ətrafında fikir mübadiləsi aparılıb.

Layihənin icrası zamanı dünyada və ölkəmizdə mövcud olan koronavirus pandemiyasının və karantin rejiminin tələblərinə ciddi şəkildə əməl olunub. Görüşlər zamanı bütün iştirakçılar tibbi qoruyucu vasitələrlə (əlcək, maska, tibbi spirt) təmin olunub. Qoruyucu vasitələrin istifadəsinə və sosial məsafənin qorunmasına ciddi şəkildə nəzarət edilib. 

“Aqrar İnkişaf Könüllülər” Təşkilatı “Səyyar Aqro Məktəb” layihəsinin icrasına başlayır

“Aqrar İnkişaf Könüllüləri” Təşkilatının təşkilatçılığı, Azərbaycan Gənclər Fondunun maliyyə dəstəyi ilə “Səyyar Aqro Məktəb” layihəsinə start verilir.

Aqrar sahədə ilk dəfə reallaşdırılacaq “Səyyar Aqro Məktəb” layihəsi çərçivəsində “Zoom” platforması vasitəsilə təsərrüfat sahələrində onlayn formatda təlimlər həyata keçiriləcək.

Ölkəmizdə dinamik şəkildə inkişaf edən aqrar sahəyə marağın daha da artırılması və mütəxəssislərin yetişdirilməsi mühüm əhəmiyyət kəsb etdiyindən kənd təsərrüfatının əsas istiqamətlərindən olan heyvandarlığın inkişafı, məhsul istehsalının artırılması, gənc fermerlərin yetişdirilməsi əsas hədəflərdəndir.

Layihənin əsas məqsədi regionlarda yaşayan gənclərin aqrar sahə üzrə bilik və bacarıqlarının artırılmasına nail olmaqdır. Layihəyə əsasən, kənd təsərrüfatı sahəsi üzrə biliklərin müfəssəl şəkildə gənclərə çatdırılması nəzərdə tutulur. Bu məqsədlə “Səyyar Aqro Məktəb” layihəsi çərçivəsində Zaqatala, Şəki, Qax, Balakən, Oğuz və Şamaxı rayonlarında təlim və görüşlər təşkil ediləcək.

Layihənin 2 mərhələ üzrə həyata keçirilməsi planlaşdırılır. Birinci mərhələdə regionlarda xüsusi təsərrüfat sahələri üzrə 300 gəncə peşəkar mütəxəssislər tərəfindən təlimlər keçiriləcək. Təlimlərdə təsərrüfatların yaradılması, idarəedilməsi və gələcəkdə inkişaf etdirilməsi, həmçinin aqrar təhsilin əhəmiyyəti və imkanları haqqında ətraflı məlumat veriləcək.

Layihənin icrası zamanı dünyada və ölkəmizdə mövcud olan koronavirus pandemiyasının və karantin rejiminin tələblərinə ciddi şəkildə əməl olunacaq. Görüşlər zamanı bütün iştirakçılar tibbi qoruyucu vasitələrlə (əlcək, maska, tibbi spirt) təmin olunacaqlar. Qoruyucu vasitələrin istifadəsinə və sosial məsafənin qorunmasına ciddi şəkildə nəzarət ediləcək.

“Aqrar İnkişaf Könüllüləri” Təşkilatının I Ümumrespublika Veb Forumu başlayıb

Aqrar İnkişaf Könüllülərinin I Ümumrespublika Veb Forumuna start verilib. Onlayn formatda keçirilən forumun əsas məqsədi ölkəmizin hərtərəfli və davamlı inkişafı istiqamətində könüllülərin fəaliyyətini, xüsusi karantin rejimi müddətində koronavirus infeksiyasının geniş yayılmasına qarşı həyata keçirilən tədbirlərdə fəal iştirakını müzakirə etmək, gənclərin aqrar sahəyə marağını daha da artırmaq, onların fərdi inkişafı və vaxtlarının səmərəli təşkilinə dəstək olmaqdır.

Forumun açılış mərasimində çıxış edən Kənd Təsərrüfatı naziri İnam Kərimov bildirib ki, Azərbaycan Respublikasının Prezidenti cənab İlham Əliyevin rəhbərliyi ilə ölkədə aqrar sahənin inkişafı yeni mərhələyə qədəm qoyub. Nazir qeyd edib ki, dövlət başçısının verdiyi tapşırıqlara uyğun olaraq aqrar sahənin inkişafı istiqamətində davamlı tədbirlər həyata keçirilir.

Könüllülük hərəkatının inkişafına dövlət dəstəyinin gənclərin bu sahəyə marağını daha da artırdığını deyən nazir İnam Kərimov ölkədə müxtəlif sahələr üzrə könüllülük təşkilatlarının təsis olunmasını, könüllülük təşkilatlarının fəaliyyətlərinin birgə koordinasiya edilməsini müsbət hal adlandırıb.

Nazir bildirib ki, Aqrar İnkişaf Könüllüləri müxtəlif bölgələrdə məktəblilər arasında maarifləndirmə işləri aparır, gənclər arasında aqrar təhsilə marağı artırmağa çalışır: “Son iki ildə Aqrar İnkişaf Könüllüləri 40-dək layihə həyata keçirib. Bu layihələr gənclərin kənd təsərrüfatının müxtəlif sahələrinə marağını artırır, aqrar sektorun dinamik inkişafını təmin edəcək kadr potensialının formalaşmasına təsir göstərir”.

Nazir İnam Kərimiov çıxışının sonunda forumun işinə uğurlar arzulayıb.

Daha sonra forum panel müzakirələrlə davam etdirilib. Azərbaycan Dövlət Aqrar Universitetinin rektoru İbrahim Cəfərov “Aqrar təhsilin əhəmiyyəti”, FAO-Azərbaycan tərəfdaşlıq proqramının rəhbəri Namiq Məmmədov “Ərzaq təhlükəsizliyi”,  Aqrar Tədqiqatlar Mərkəzinin direktoru Firdovsi Fikrətzadə “Aqrar sahədə məlumat bazası” mövzuları üzrə məruzə ilə çıxış ediblər.

Qeyd edək ki, “Aqrar İnkişaf Könüllüləri” Təşkilatının I Ümumrespublika Veb Forumu 3 gün davam edəcək. Növbəti günlərdə forumda Aqrar Kredit və inkişaf Agentliyinin sədri Mirzə Əliyev “Aqrar sahədə maliyyə mexanizmləri”, Aqrar Elm və İnnovasiya Mərkəzinin direktor müavini “Aqrar innovasiyalar”,  Kənd Təsərrüfatı İşçilərinin Həmkarlar İttifaqı Birliyinin sədri Fuad Məmmədov “Aqrar sahədə həmkarlar təşkilatının fəaliyyəti”, Kənd Təsərrüfatı Nazirliyinin Aparat rəhbərinin müavini Elvin Paşayev “Aqrar sahədə insan resurslarının idarəedilməsi”, Aqrar Tədqiqatlar Mərkəzinin Tədqiqatlar departamentinin müdir müavini Pərviz Əliyev “Aqrar iqtisadiyyat”, Şamaxı Dövlət Aqrar İnkişaf Mərkəzinin direktoru Etibar Muradlı isə “Gənc menecerlərin aqrar sahəyə cəlbi” mövzusunda çıxış edəcəklər.