Azərbaycanda Aqrar İnkişaf Könüllüləri Hərəkatına start verilir
Azərbaycanda aqrar sektorun inkişafına ictimai dəstək vermək üçün Aqrar İnkişaf Könüllüləri Hərəkatı yaradılır. Hərəkat bir qrup gəncin təşəbbüsü ilə yaradılıb.
Trend-in məlumatına görə, hərəkatın yaradılmasında məqsəd aqrar sektorun inkişafına ictimai dəstək vermək, vətəndaşların və fermerlərin aqrar sahədəki problemlərini müəyyənləşdirmək, həll yollarını tapmaq, innovativ texnologiyaların tətbiqinə nail olmaq, gənc mütəxəssislərin aqrar sahəyə dair kreativ ideyalarını reallaşdırmaq, cəmiyyətin diqqətini aqrar sahəyə yönəltməkdir.
Hərəkatın təşəbbüskarlarından Fidan Alıyeva, Rübabə Yusifova, Zöhrə Məmmədova, Sarvan Cəbrayılzadə, Atilla-Turan Bayramov, Etibar Muradlı və Valeh Əsədov ölkənin ali təhsil ocaqlarının tələbələrini və müxtəlif sahələrdə fəaliyyət göstərən gəncləri könüllülər hərəkatına cəlb etmək məqsədilə təqdimatlar keçirəcək.
Təqdimat kampaniyası sentyabrın əvvəllərindən başlayacaq.
